ನವದೆಹಲಿ : 1993ರ ಮುಂಬೈ ಸರಣಿ ಬಾಂಬ್ ಸ್ಫೋಟ ಪ್ರಕರಣದ ಪ್ರಮುಖ ಅಪರಾಧಿ ಹಾಗೂ ಗ್ಯಾಂಗ್ಸ್ಟರ್ ಅಬು ಸಲೇಂಗೆ ಸುಪ್ರೀಂ ಕೋರ್ಟ್ನಲ್ಲಿ ಭಾರಿ ಹಿನ್ನಡೆಯಾಗಿದೆ. ಜೈಲಿನಲ್ಲಿ ಈಗಾಗಲೇ 25 ವರ್ಷಗಳ ಶಿಕ್ಷೆ ಪೂರ್ಣಗೊಂಡಿದ್ದು, ತಕ್ಷಣ ಬಿಡುಗಡೆ ಮಾಡಬೇಕೆಂದು ಸಲೇಂ ಸಲ್ಲಿಸಿದ್ದ ಅರ್ಜಿಯನ್ನು ಸುಪ್ರೀಂ ಕೋರ್ಟ್ ವಜಾಗೊಳಿಸಿದೆ. ನ್ಯಾಯಮೂರ್ತಿಗಳಾದ ವಿಕ್ರಮ್ ನಾಥ್ ಮತ್ತು ಸಂದೀಪ್ ಮೆಹ್ತಾ ಅವರ ಪೀಠ, ಬಾಂಬೆ ಹೈಕೋರ್ಟ್ ನೀಡಿದ್ದ ತೀರ್ಪನ್ನು ಎತ್ತಿಹಿಡಿದಿದೆ. ಸಲೇಂನ ಅರ್ಜಿ ಅಕಾಲಿಕವಾಗಿದ್ದು, ಆತನ 25 ವರ್ಷಗಳ ಶಿಕ್ಷೆಯ ಅವಧಿ 2030ರ ನವೆಂಬರ್ನಲ್ಲಿ ಪೂರ್ಣಗೊಳ್ಳಲಿದೆ ಎಂದು ನ್ಯಾಯಾಲಯ ಸ್ಪಷ್ಟಪಡಿಸಿದೆ.
25 ವರ್ಷಗಳ ಲೆಕ್ಕದಲ್ಲಿ ಗೊಂದಲ
ಪೋರ್ಚುಗಲ್ನಲ್ಲಿ ತಾನು ಬಂಧನಕ್ಕೊಳಗಾದ ದಿನದಿಂದಲೇ ಶಿಕ್ಷೆಯ ಅವಧಿ ಲೆಕ್ಕ ಹಾಕಬೇಕು ಎಂದು ಅಬು ಸಲೇಂ ವಾದಿಸಿದ್ದ. ಆದರೆ ಭಾರತೀಯ ನ್ಯಾಯಾಲಯಗಳ ಪ್ರಕಾರ, 2005ರಲ್ಲಿ ಭಾರತಕ್ಕೆ ಹಸ್ತಾಂತರವಾದ ದಿನದಿಂದ ಶಿಕ್ಷೆಯ ಅವಧಿಯನ್ನು ಅಧಿಕೃತವಾಗಿ ಪರಿಗಣಿಸಲಾಗುತ್ತದೆ. ಜೈಲಿನಲ್ಲಿ ಕಳೆದ ಅವಧಿ ಹಾಗೂ ಶಿಕ್ಷೆಯ ವಿನಾಯಿತಿಯನ್ನು ಸೇರಿಸಿದರೂ 25 ವರ್ಷಗಳ ಶಿಕ್ಷೆ ಪೂರ್ಣಗೊಂಡಿದೆ ಎಂಬ ಸಲೇಂನ ವಾದವನ್ನು ನ್ಯಾಯಾಲಯ ತಿರಸ್ಕರಿಸಿದೆ.
ಹಸ್ತಾಂತರ ಒಪ್ಪಂದವೇ ಪ್ರಮುಖ
2002ರಲ್ಲಿ ಪೋರ್ಚುಗಲ್ನ ಲಿಸ್ಬನ್ನಲ್ಲಿ ಅಬು ಸಲೇಂ ಬಂಧನಕ್ಕೊಳಗಾಗಿದ್ದ. ಭಾರತಕ್ಕೆ ಹಸ್ತಾಂತರಿಸುವ ಸಂದರ್ಭದಲ್ಲಿ ಪೋರ್ಚುಗಲ್ಗೆ ನೀಡಿದ್ದ ಬದ್ಧತೆಯಂತೆ, ಸಲೇಂಗೆ ಮರಣದಂಡನೆ ವಿಧಿಸಬಾರದು ಹಾಗೂ 25 ವರ್ಷಗಳಿಗಿಂತ ಹೆಚ್ಚು ಕಾಲ ಜೈಲಿನಲ್ಲಿ ಇರಿಸಬಾರದು ಎಂಬ ಷರತ್ತು ಇತ್ತು.
ಈ ಹಿನ್ನೆಲೆಯಲ್ಲಿ 25 ವರ್ಷಗಳ ಅವಧಿ ಪೂರ್ಣಗೊಂಡ ಬಳಿಕ ಆತನ ಬಿಡುಗಡೆಗೆ ರಾಷ್ಟ್ರಪತಿಗೆ ಶಿಫಾರಸು ಮಾಡುವುದಾಗಿ ಕೇಂದ್ರ ಸರ್ಕಾರ ಈ ಹಿಂದೆ ಸುಪ್ರೀಂ ಕೋರ್ಟ್ಗೆ ತಿಳಿಸಿತ್ತು. ಆದರೆ ಆ ಅವಧಿ ಇನ್ನೂ ಪೂರ್ಣಗೊಂಡಿಲ್ಲ ಎಂದು ನ್ಯಾಯಾಲಯ ಹೇಳಿದೆ.
ಮುಂಬೈ ಸ್ಫೋಟ, ಪ್ರದೀಪ್ ಜೈನ್ ಹತ್ಯೆ ಪ್ರಕರಣ
1993ರ ಮುಂಬೈ ಸರಣಿ ಬಾಂಬ್ ಸ್ಫೋಟದಲ್ಲಿ ಶಸ್ತ್ರಾಸ್ತ್ರ ಪೂರೈಕೆಗೆ ನೆರವಾದ ಆರೋಪ ಅಬು ಸಲೇಂ ಮೇಲಿತ್ತು. ಈ ಸ್ಫೋಟದಲ್ಲಿ 257 ಮಂದಿ ಮೃತಪಟ್ಟಿದ್ದರು. ಇದರ ಜೊತೆಗೆ 1995ರಲ್ಲಿ ಮುಂಬೈ ಉದ್ಯಮಿ ಹಾಗೂ ಬಿಲ್ಡರ್ ಪ್ರದೀಪ್ ಜೈನ್ ಹತ್ಯೆ ಪ್ರಕರಣದಲ್ಲೂ ಸಲೇಂ ಜೀವಾವಧಿ ಶಿಕ್ಷೆ ಅನುಭವಿಸುತ್ತಿದ್ದಾನೆ. ಗ್ಯಾಂಗ್ಸ್ಟರ್ ಆಗಿದ್ದ ಅವಧಿಯಲ್ಲಿ ಬಾಲಿವುಡ್ನಿಂದ ಸುಲಿಗೆ ನಡೆಸುತ್ತಿದ್ದ ಆರೋಪವೂ ಸಲೇಂ ಮೇಲಿದೆ. ನಟಿ ಮೋನಿಕಾ ಬೇಡಿ ಜತೆ ಪೋರ್ಚುಗಲ್ಗೆ ಪರಾರಿಯಾಗಿದ್ದ ವೇಳೆ ನಕಲಿ ಪಾಸ್ಪೋರ್ಟ್ ಪ್ರಕರಣದಲ್ಲಿ ಇಬ್ಬರೂ ಬಂಧಿತರಾಗಿದ್ದರು.
